बलरामपुर, 06 जनवरी।
बलरामपुर जिला मं अवैध धान परिवहन ऊपर प्रशासन अभी कड़ाई ले कार्रवाई करत नजर आत हे। बीती मध्यरात होए एक बड़े अभियान मं प्रशासनिक अऊ पुलिस टीम 25 किलोमीटर तक पीछा करके अवैध धान ले लदे ट्रक ला जपत कर लीन, जिहां 750 बोरी धान जब्त होए हे। ये कार्रवाई ले कोचिया, बिचौलिया अऊ अवैध परिवहन के नेटवर्क मं हड़कंप मच गे हे।
कलेक्टर राजेंद्र कटारा के मार्गदर्शन मं जिला प्रशासन धान के अवैध खरीदी-बिक्री, परिवहन अऊ भंडारण खिलाफ सख्त रुख अपनाए हुए हे। शासन के निर्देश मुताबिक कोचिया मन ऊपर कड़ी कार्रवाई के नीति के तहत लगातार निगरानी बढ़ाय गीस।
जानकारी मुताबिक, अनुविभाग वाड्रफनगर क्षेत्र मं बीती मध्यरात गिरवानी रोड के रास्ते उत्तर प्रदेश ले छत्तीसगढ़ के ओर एक ट्रक मं अवैध रूप से धान ढो ले जावत रहिस। बैरियर ड्यूटी मं तैनात कर्मचारी मन ट्रक ला रोकना चाहिन, फेर चालक ट्रक ला तेज गती मं भगावत, मौके ले फरार होगे।
घटना के जानकारी तुरंत वरिष्ठ अधिकारी मन ला देय गीस। सूचना मिलते ही अनुविभागीय अधिकारी (राजस्व) नीर निधि नंदेहा के निर्देशन मं तहसीलदार वाड्रफनगर, तहसीलदार रघुनाथनगर, नायब तहसीलदार अऊ पुलिस बल के संयुक्त टीम बनाके रात मं ही सघन सर्च अभियान चालू कर दे गीस।
करीब 25 किलोमीटर के दायरा मं संभावित मार्ग, गांव अऊ सीमावर्ती इलाका मन के बारिक तलासी ले जावत रहिस। लगातार पीछा अऊ सर्च के बाद टीम पेंडारी क्षेत्र के पास धान ले भरें ट्रक ला पकड़ लेय। जांच मं ट्रक मं लग्भग 750 बोरी धान लोड पाय गीस, जऊन ला बिना वैध कागज-पत्तर के ढोय जावत रहिस। ट्रक ला जप्त करके आगे के कार्रवाई बर वाड्रफनगर थाना के सुपुर्द कर देय गे हे।
प्रशासन साफ कहे हे के जिला मं धान उपार्जन व्यवस्था ला पारदर्शी बनाय रखे अऊ किसाना के हित के रक्षा बर अवैध परिवहन अऊ भंडारण ऊपर लगातार नजर रखे जावत हे। सीमावर्ती इलाका मन मं बैरियर के सतर्कता बढ़ा दे गे हे अऊ नियमित जांच जारी हे।
अनुविभागीय अधिकारी (राजस्व) नंदेहा आज मंगल के दिन बताइन के आने वाले दिन मन मं घलो ए तरह के संयुक्त अभियान निरंतर चलत रहीन, अऊ जऊन मन अवैध गतिविधि मं शामिल पाय जहीं, वो मन ऊपर कड़ी कानूनी कार्रवाई होही।
प्रशासन, आम जनता ले घलो अपील करे हे के धान के अवैध परिवहन या भंडारण के जानकारी मिलत ही तुरंत प्रशासन ला सूचित करं, ताकि समय मं प्रभावी कार्रवाई हो सके।